أنتلجنسيا المغرب:ع.الباز
فـ سنة 2026،
غادي يوليو الانتخابات عندنا بحال بطولة كأس العالم،
لكن ماشي فـ فيفا ديال الكرة،
بل فـ "فيفا ديال الهضرة"،
فين كل سياسي غادي يلبس جلابية البرامج،
ويشد كرافاطة النية،
والمواطن؟
غادي يبقى كيتفرّج من التيراس،
بتيكي ديال الشكّ… وكاس ديال الصبر!
غادي يوليو التصويت فـ تابلت،
والبرنامج الانتخابي غادي توصلك فـ PDF،
والوعد ديال المرشح غادي يجيك فـ SMS،
مع إيموجي ديال الابتسامة!
و غادي يسوّل:
> "واش غادي يوصّل معاه القفّة؟
ولا غير وعود إلكترونية… والتخفيض باقي غير “جار التحميل”؟"
السياسيين غادي يوليو سوبرمانات رقمية:
كل واحد غادي يدير حملة فـ "الميتافيرس"،
يبني مستشفيات فـ VR،
ويزرع الأمل فـ قرى وهمية،
ويصوّر فيديوهات مع المواطنين… بصوت ديال الذكاء الاصطناعي!
والمواطن؟
غادي يبقى فالسوق كيقلّب على بصلة بلا “ذكاء تجاري”!
البرامج الانتخابية؟
غادي يوليو بحال تطبيقات:
شكلها زوين،
لكن كتطيّح فـ أول محاولة تشغيل!
وغادي نسمعو:
> "غا ندعمو المواد الأساسية!"
و غادي يردّ:
"السكر غادي يرجع كيتباع فـ كيسات صغيرة،
والزيت غادي توصلك حتى للدار…
ولكن بثمن التوصيل والكرامة معاً!"
المناظرات؟
غادي يوليو بث مباشر فـ التيك توك،
كلشي لابس ستايل،
الكلمات موزونة،
والوعود مرصّعة!
– واحد غادي يقول: "غا نضمن التشغيل!"
– الثاني: "غا نقضي على الغلاء!"
– الثالث: "غا نرجّعو الثقة بين المواطن والسياسة!"
و غادي يضحك:
> "فين كنتو فـ 2025؟
كتراجعو فـ برنامج “كيف تكسب الانتخابات وتنسى الشعب”؟"
والمواطن؟
غادي يبقى فحالو…
عارف الكذبة من بعيد،
حافظ السيناريو،
وشاف الحلقة ديال هاد الفيلم عشرات المرات،
غير الخلفية تغيّرت…
والكذب باقي فـ HD!
> "فـ 2026، حتى الانتخابات غادي تولّي ذكية…
لكن الكذب غادي يبقى كلاسيكي!"
> "وحكومة المونديال؟
نفس التشكيلة، نفس الأسلوب،
غا يبدلو الشعار…
والمواطن باقي كيشجع فريق ما تيهزش الكأس!"
لا توجد تعليقات:
للأسف، لا توجد تعليقات متاحة على هذا الخبر حاليًا.
أضف تعليقك